ફોર એસ વી -પ્રભાતનાં પુષ્પો

મારા ફ્લેટમાં આવે છે ભેજ
કેમે ના સમજાતું અંદર દિવાલમાં
         કે મારી આંખમાં આ લીકેજ… મારા ફ્લેટમાં.

એક પછી એક એના ઊખડે છે પોપડા
હિંમત હારી બેઠી ભીંત
                  ધ્રાસકા સમેત બધી જોયા કરે છે
પહેલાં કઈ પડવાની ઈંટ
         સૂરજ નથી ને મારે ઓચિંતું જોઈએ છે
         ક્યાંયથીય એક મૂઠી તેજ… મારા ફ્લેટમાં.

ફ્લેટમાં દરિયો ઘુસાડ્યો આ કોણે
                  કોણે માંગ્યું’તું આમ પાણી
સાંજ પડે દિવસો પણ ડૂસકાં થઈ જાય
         સુખની આ પાઈપલાઈન કાણી
આવા ને આવા તું બાંધે છે ફ્લેટ
         એમાં તારી ખરડાય છે ઇમેજ… મારા ફ્લેટમાં.

         - મુકેશ જોશી

(સૌજન્ય : વિવેક)(Mukesh Joshi -Sukh ni pipeline kani. Ghazals in Gujarati. Literature and art site)

મારા નિષ્ફળ બચાવનો કિસ્સો,
પીઠ પાછળના ઘાવનો કિસ્સો.

મારા ઘેરા લગાવનો કિસ્સો;
તારા આછા ઝુકાવનો કિસ્સો.

આમ તો બીજું શું છે આ હોવું ?
શ્વાસની આવજાવનો કિસ્સો.

જઈ ડૂબ્યો કાવ્યની સરિતામાં
મારી કાગળની નાવનો કિસ્સો.

કાંઠે બેસી તરસ નિરૂપે છે
એક સુક્કા તળાવનો કિસ્સો.

         - ભગવતીકુમાર શર્મા

(સૌજન્ય : વિવેક)(BhagvatiKumar Sharma. Kisso. Ghazal in Gujarati. Literature and art site)

કિરણ આવ્યાં તો અંધારાં કરમ ઓગાળવા આવ્યાં,
આ ઝાકળ શાને પોતાના જનમ ઓગાળવા આવ્યાં !

કહી દીઘું ખરેખર સ્પર્શને: આજે ઝૂકીશું નહિ,
છુઇમુઇનાં પર્ણો જો, શરમ ઓગાળવા આવ્યાં.

હતી એક જ શરત આખી સફરની, સાહજીક બનવું,
સમજ જે આ લઇ આવ્યા ભરમ ઓગાળવા આવ્યાં.

અમારે દેવ-દેવી, દોરા-ધાગા, સુખ ને દુ:ખ છે પ્રેમ,
ખરાં દર્શન કરી દૈર-ઓ-હરમ ઓગાળવા આવ્યાં.

અધિકૃત હો ભલે, તો પણ પ્રશસ્તિઓ ગમે છે ક્યાં ?
તમારી પાસે આવ્યા તો અહમ ઓગાળવા આવ્યાં.

       – શોભિત દેસાઇ(Shobhit Desai – Aaham Oogalvaa aaviya. Ghazals in Gujarati. Literature and art site)