Archive for December, 2007

એષા દાદાવાલા – સમજણ

Wednesday, December 19th, 2007

સતોડિયું રમતાં રમતાં કુંડાળામાં મુકેલી ઠીકરીઓને ધારી ધારીને જોતી આંખો
અચાનક ક્યારે મોટી થઈ ગઈ એ સમજાયું નહીં.
એ અસમજણને કારણે જ મારામાં રહેલી બાળકવૃત્તિને મારી અંદર જ સાચવી રાખી વર્ષો સુધી…!
મારી આંખો હવે, સામેવાળાની આંખોને બહુ સરળતાથી પારખી શકે છે એવો અહમ્ આવ્યો અને
અંદર જ સાચવી રાખેલી બાળક વૃત્તિમારી અંદર જ ખોવાતી ગઈ ક્યાંક…!
જોકે,
આંખોની નાની અમથી ગોખલીમાં દિવસનાં અજવાળામાં જ્યાં સપનાંઓ છુપાઈને રહેતાં’તાં,
ત્યાં જ આંસુઓ છુપાઈને રહેવા માંડ્યાં
ત્યારે જ મારે સમજી જવું જોઈતું’તું કે હું મોટી થઈ ગઈ છું…!

         - એષા દાદાવાલા(Esha Dadawala – samjan. Kaivta in Gujarati. Literature and art site)

મુકેશ જોષી – પ્રેમમાં ક્યાં જાણકારી જોઇએ

Monday, December 17th, 2007

પ્રેમમાં ક્યાં જાણકારી જોઇએ
બસ હ્રદય વચ્ચે કટારી જોઇએ

શ્રીહરી ને છોકરીમાં સામ્યતા
બેઉ જણ માટે પૂજારી જોઇએ

આપણા ઘરમાં જ હો ચાલે નહીં
એમના ઘરમાં ય બારી જોઇએ

નાગ ને નાગણ હવે ઘરડાં થયાં
દિકરા જેવો મદારી જોઇએ

એ અગાસીમાં સૂતેલા હોય તો
ચાંદ પર મારે પથારી જોઇએ.

         - મુકેશ જોષી(Mukesh Joshi – Prem ma kya jaankari joeyae. Ghazal in Gujarati. Literature and art site)

અંકિત ત્રિવેદી – આંખોમાં

Saturday, December 15th, 2007

ક્યાં કશું છે સમાન આંખોમાં
છે ભૂલાયેલ ભાન આંખોમાં -

ર્દશ્યની જો ઘરાકી જામી છે
હોય જાણે દુકાન આંખોમાં -

ચોતરફ જોઇને હું મૂંઝાઉં છું
કોનું છે વૃંદગાન આંખોમાં – ?

સાવ પાસે અડીને ઊગેલો
ઊઘડે વર્તમાન આંખોમાં -

આપણાથી કશું ન બોલાયું
એમનું પણ સ્વમાન આંખોમાં – !

તુંય આવી ઊડી શકે છે અહીં
લે, ધર્યું આસમાન આંખોમાં

          -અંકિત ત્રિવેદી(Ankit Trivedi – Ankho maa. Ghazals in Gujarati. Literature and art site)