Archive for January, 2009

ભાનુપ્રસાદ પંડ્યા – દેખ્યાનો દેશ ભલે લઇ લીધો, નાથ !

Monday, January 26th, 2009

(કાવ્યપ્રકાર : ગીત)

દેખ્યાનો દેશ ભલે લઇ લીધો, નાથ !
પણ કલરવની દુનિયા અમારી !
વાટે રખડ્યાની મોજ છીનવી લીધી
ને તોયે પગરવની દુનિયા અમારી !

કલબલતો થાય જ્યાં પહેલો તે પહોર
બંધ પોપચાંમાં રંગોની ભાત !
લોચનની સરહદથી છટકીને રણઝણતું
રૂપ લઇ રસળે શી રાત

લ્હેકાએ લ્હેકાએ મ્હોરતા અવાજના
વૈભવની દુનિયા અમારી

ફૂલોના રંગ રિસાય ગયા, જાળવતી
નાતો આ સામટી સુગંધ !
સમા સમાના દઇ સંદેશા લ્હેરખી
અડક્યાનો સાચવે સંબંધ !

ટેરવાંને તાજી કૈં ફૂટી તે નજરુંના
અનુભવની દુનિયા અમારી.

         – ભાનુપ્રસાદ પંડ્યા (Bhanuprasad Pandya – Dekhya no desh bhale lao lidho naath. Kaivta in Gujarati. Literature and art site)

વેણીભાઇ પુરોહિત – અટકળ બની ગઈ જિન્દગી

Tuesday, January 13th, 2009

આ તરફ એની મુરાદો, મુજ ઈરાદો ઓ તરફ..
બેઉ બોજા ખેંચતાં કાવડ બની ગઈ જિન્દગી!

હમસફરની આશમાં ખેડી સફર વેરાનમાં,
ફક્ત શ્વાસોચ્છવાસની અટકળ બની ગઈ જિન્દગી!

સ્મિતનું બહાનું શોધતું મારું રુદન રઝળી પડ્યું,
હાસ્ય ને રુદનની ભૂતાવળ બની ગઈ જિન્દગી!

વિશ્વમાં કો સાવકું સરનામું લઈ આવી ચડ્યો,
કાળની અબજો અજીઠી પળ, બની ગઈ જિન્દગી!

ફૂલને કાંટાની કુદરત છે, અરે તેથી જ તો –
ગુલછડીના ખ્યાલમાં બાવળ બની ગઈ જિન્દગી!

દિલ ન’તું પણ વાંસનું જંગલ હતું, ઝંઝાનિલો!
આપ આવ્યા? હાય! દાવાનળ બની ગઈ જિન્દગી!

          -વેણીભાઇ પુરોહિત (Vanibhai Purohit – Aatkal bani gai zindagi. Ghazal in Gujarati. Literature and art site)

‘સુન્દરમ્’ ત્રિભોવનદાસ લુહાર – રંગ રંગ વાદળિયાં

Tuesday, January 6th, 2009

'સુંદરમ' ત્રિભોવનદાસ લુહાર / 'Sundaram' Tribhuvandas Luhar
હાં રે અમે ગ્યાં’તાં, હો રંગના ઓવારે, કે તેજના ફુવારે
અનંતને આરે, કે રંગ રંગ વાદળિયાં

હાં રે અમે ઊડ્યાં; હો મોરલાના ગાણે, કે વાયરાના વહાણે
આશાના સુકાને, કે રંગ રંગ વાદળિયાં

હાં રે અમે થંભ્યાં, હો મહેલના મિનારે,પંખીના ઉતારે
ડુંગરાની ધારે,કે રંગ રંગ વાદળિયાં

હાં રે અમે નાહ્યાં, હો રંગના ઓવારે,કે તેજના ફુવારે
કુંકુમના ક્યારે,કે રંગ રંગ વાદળિયાં

હાં રે અમે પોઢ્યાં, છલકતી છોળે, દરિયાને હિંડોળે
ગગનને ગોળે, કે રંગ રંગ વાદળિયાં

હાં રે અમે જાગ્યાં, ગુલાલ ભરી ગાલે,ચંદન ધરી ભાલે
રંગાયાં ગુલાલે,કે રંગ રંગ વાદળિયાં

હાં રે અમે નાચ્યાં, તારાના તરંગે, રઢિયાળા રંગે
આનંદના અભંગે, કે રંગ રંગ વાદળિયા

હાં રે અમે આવ્યાં, હો રંગ રંગ અંગે,અનંત રૂપરંગે
તમારે ઉછંગે,કે રંગ રંગ વાદળિયાં

          – ‘સુંદરમ’ ત્રિભોવનદાસ લુહાર

અન્ય રચનાઓ

  • ‘સુંદરમ’ ત્રિભોવનદાસ લુહાર – ઝાંઝરણું
  • ‘સુંદરમ’ ત્રિભોવનદાસ લુહાર – સૌંદર્ય
  • (‘Sundaram’ Tribhuvandas Luhar – rang rang vadaiya. Lok Sahitya, Bal geeto in Gujarati. Literature and art site)

    અવિનાશ વ્યાસ – રામ તમે સીતાજીની તોલે ન આવો

    Sunday, January 4th, 2009



    રામ રામ રામ …

    દયાના સાગર થઇ ને, કૃપા રે નિધાન થઇ ને
    છોને ભગવાન કહેવડાવો
    પણ રામ તમે સીતાજીની તોલે ન આવો
    મારા રામ તમે સીતાજીની તોલે ન આવો

    સોળે શણગાર સજી મંદિરને દ્વાર તમે
    ફૂલ ને ચંદનથી છો પૂજાઓ
    પણ રામ તમે સીતાજીની તોલે ન આવો
    મારા રામ તમે સીતાજીની તોલે ન આવો

    કાચા રે કાનના તમે, ક્યાંના ભગવાન તમે
    અગ્નિ પરીક્ષા કોની કીધી
    તમારો પડછાયો થઇ ને
    વગડો રે વેઠ્યો એને લોકોની વાતે ત્યાગી દીધી

    પતિ થઇ ને પત્નીને પારખતાં ન આવડી
    છો ને ઘટઘટના જ્ઞાતા થઇ ફૂલાઓ
    પણ રામ તમે સીતાજીની તોલે ન આવો
    મારા રામ તમે સીતાજીની તોલે ન આવો

    તમથીયે પહેલા અશોક વનમાં
    સીતાજીએ રાવણને હરાવ્યો
    દૈત્યોના વચ્ચમાં નિરાધાર નારી તો યે
    દશ માથાવાળો ત્યાં ના ફાવ્યો

    મરેલાને માર્યો તેમાં કર્યું શું પરાક્રમ
    અમથો વિજયનો લૂટ્યો લ્હાવો
    મારા રામ તમે સીતાજીની તોલે ન આવો
    મારા રામ તમે સીતાજીની તોલે ન આવો

              – અવિનાશ વ્યાસ

    અન્ય રચનાઓ
  • અવિનાશ વ્યાસ – ચરર ચરર
  • અવિનાશ વ્યાસ – છુક છુક ગાડી
  • અવિનાશ વ્યાસ – તાલીઓના તાલે ગોરી
  • અવિનાશ વ્યાસ – માડી તારું કંકુ ખર્યુ
  • અવિનાશ વ્યાસ – રાખનાં રમકડાં
  • (Avinash Vyas. mara ram tame Lok Sahitya, bhajan-aarti in Gujarati. Literature and art site)

    રાજેન્દ્ર શાહ – કેવડિયાનો કાંટો

    Friday, January 2nd, 2009

    કેવડિયાનો કાંટો અમને વનવગડામાં વાગ્યો રે,
    મૂઈ રે એની મ્હેક, કલેજે દવ ઝાઝેરો લાગ્યો રે.

             બાવળિયાની શૂળ હોય તો
             ખણી કાઢીએ મૂળ,
             કેરથોરના કાંટા અમને
             કાંકરિયાળી ધૂળ;

    આ તો અણદીઠાનો અંગે ખટકો જાલિમ જાગ્યો રે,
    કેવડિયાનો કાંટો અમને વનવગડામાં વાગ્યો રે.

             તાવ હોય જો કડો ટાઢિયો
             કવાથ કુલડી ભરીએ,
             વાંતરિયો વળગાડ હોય તો
             ભૂવો કરી મંતરીએ;

    રૂંવે રૂંવે પીડ જેની એ તો જડે નહિ કહીં ભાંગ્યો રે,
    કેવડિયાનો કાંટો અમને વનવગડામાં વાગ્યો રે.

             – રાજેન્દ્ર શાહ

    અન્ય રચનાઓ
  • રાજેન્દ્ર શાહ – આવી રળિયાત
  • રાજેન્દ્ર શાહ – આનંદો રે આજ આનંદ આનંદ
  • રાજેન્દ્ર શાહ – તને જોઇ જોઇ
  • રાજેન્દ્ર શાહ – બપોર
  • રાજેન્દ્ર શાહ – વૈશાખ લાલ
  • (Rajendra Shah. kevadiya no kaato. Kavita. Literature and art site)