દીપક ત્રિવેદી – મનમાં જ હોય છે !

જટિલ કે સરલ મનમાં જ હોય છે !
ચલિત કે અચલ મનમાં જ હોય છે !

એનું સ્વરૂપ શું? જેનું નથી સ્વરૂપ -
સઘન કે તરલ મનમાં જ હોય છે !

વાંચી શકાય તો એ ખબર પડે-
શુષ્ક કે સજલ મનમાં જ હોય છે !

સરખું જ હોય છે ત્વચાનું આવરણ
શણ કે મલમલ મનમાં જ હોય છે !

યુગોથી એ ધખે ; ચાલે નદી થઇ;
સલિલ કે અનલ મનમાં જ હોય છે !

ચિત્રમાં બધા જ; રંગ મેં પૂર્યા ;
હરિત કે ધવલ મનમાં જ હોય છે !

ફકીરને તો શું, પામવું કહો?
મુકામ કે મજલ મનમાં જ હોય છે !

તર્કબદ્ધ હો બધું : દ્રશ્યદ્રશ્યમાં-
પૃથક કે સકલ મનમાં જ હોય છે !

          – દીપક ત્રિવેદી

અન્ય રચનાઓ

  • દીપક ત્રિવેદી – શું થવાનું ?
  • (‘Deepak Trivedi – Maan ma hoi chhe. Ghazal in Gujarati. Literature and art site)

    Tags:

    2 Responses to “દીપક ત્રિવેદી – મનમાં જ હોય છે !”

    1. રાકેશ ઠક્કર, વાપી says:

      સાચી વાત છે, બધું મનમાં જ હોય છે.
      યુગોથી એ ધખે ; ચાલે નદી થઇ;
      સલિલ કે અનલ મનમાં જ હોય છે !

    2. pragnaju says:

      એનું સ્વરૂપ શું? જેનું નથી સ્વરૂપ -
      સઘન કે તરલ મનમાં જ હોય છે !

      વાંચી શકાય તો એ ખબર પડે-
      શુષ્ક કે સજલ મનમાં જ હોય છે !

      આને રોકવું હોય તો કોઈકે બળવત્તર વિભાવના માણસના મનમાં સ્થાપિત કરવી જ જોઈએ. આવું બળ પૂર્વજન્મ કે પૂનર્જન્મની કલ્પના પૂરું પાડે છે