કૃષ્ણ દવે – માઈક મળે તો કોઈ છોડે

પરસેવો બીચ્ચારો રઘવાયો થઈને ભલે ચહેરા પર આમતેમ દોડે !
માઈક મળે તો કોઈ છોડે ?

નાના અમથા એ ટીપાં શું જાણે ? આ ભાષણ શું કરવાની ચીજ છે ?
આકાશે ચાંદો છે, ચાંદામાં પૂનમ ને પૂનમના પાયામાં બીજ છે
વિષયમાં એવો તો ફાંફે ચડે ને તોય તંતુને આમતેમ જોડે.
માઈક મળે તો કોઈ છોડે ?

ઉધરસ ને નસકોરા રમત્યે ચડે ને એ ય બગ્ગાસા વ્હેંચાતા ભાગમાં
કંટાળો જાણે કે આખ્ખું કુટુમ્બ લઈ ફરવા આવ્યો ન હોય બાગમાં
તાજા ઉઘડેલ એક વક્તાને ડાળીએથી ખંખેરી ખંખેરી તોડે.
માઈક મળે તો કોઈ છોડે ?

છેલ્લી બે વાત, એવું કાનમાં પડે ને કંઈક શ્રોતામાં જીવ પાછા આવે
છેલ્લી, છેલ્લી છે એમ બોલી બોલીને પાછો આખ્ખો કલાક એક ચાવે
સાકરના ગાંગડાને કચ્ચકચાવીને જાણે પકડ્યો હો ભૂખ્યા મંકોડે.
માઈક મળે તો કોઈ છોડે ?

         – કૃષ્ણ દવે (Krushna Dave – mike malae toe kon chhodae. Kavita in Gujarati. Literature and art site)

Tags :
અન્ય રચનાઓ...
કૃષ્ણ દવે – એક ચકી ને ચકો
કૃષ્ણ દવે – છેવટે કંટાળી
કૃષ્ણ દવે – ઉગાડે એમ કદી ઉગવાનું નહીં
કૃષ્ણ દવે – એને પેલ્લેથી ફાવે છે દેશી
કૃષ્ણ દવે – લીમડાને આવી ગ્યો તાવ
કૃષ્ણ દવે – શું ગાવું?
કૃષ્ણ દવે – હા અથવા ના…
કૃષ્ણ દવે – વહીવટ
કૃષ્ણ દવે – શિક્ષણ ???